ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត មានមោទនភាពចំពោះការនាំចេញរបស់កម្ពុជាដែលមានទំហំកើនឡើងពីមួយឆ្នាំទៅមួយឆ្នាំជាបន្តបន្ទាប់។
ថ្លែងក្នុងពិធីបើកពិព័រណ៍ពាណិជ្ជកម្មកម្ពុជា នាព្រឹកថ្ងៃទី ១៣ ខែធ្នូ ឆ្នាំ២០២៤ នៅមជ្ឈមណ្ឌលភីអេច ហ្គ្រេនហល បុរីប៉េងហួត បឹងស្មោ រាជធានីភ្នំពេញ សម្តេចធិបតី ហ៊ុន ម៉ាណែត បានកត់សម្គាល់ពីទំហំនាំចេញរបស់កម្ពុជារយៈពេល ១១ខែ ក្នុងឆ្នាំ២០២៤នេះ ដែលនាំចេញបាន ៥០,៤៦ប៊ីលានដុល្លារអាមេរិក កើនឡើងប្រមាណ ១៥,៩៥ ភាគរយ ធៀបនឹងរយៈពេលដូចគ្នាក្នុងឆ្នាំ ២០២៣។
សម្ដេចបានបង្ហាញពីមោទនភាព និងកោតសរសើរចំពោះកិច្ចខិតខំប្រឹងប្រែងរបស់ក្រសួងពាណិជ្ជកម្ម ក្រសួងស្ថាប័នពាក់ព័ន្ធដែលទាក់ទាញវិនិយោគ និង ការជំរុញកំណើនពាណិជ្ជកម្ម តាមរយៈការនាំ ចេញទៅទីផ្សារក្នុងតំបន់ និងសកលលោក។
សម្ដេចបានជំរុញដល់រដ្ឋមន្រ្តីក្រសួងពាណិជ្ជកម្ម ត្រូវបង្កើនសកម្មភាពបន្ថែមទៀត៖ «ក្នុងការនាំផលិតផលខ្មែរទៅក្រៅប្រទេស ហើយត្រូវទៅជួបផ្ទាល់ ទៅនិយាយផ្ទាល់ ជាមួយវិស័យឯកជន ដើម្បីធ្វើយ៉ាងណាឱ្យបរិយាកាសពាណិជ្ជកម្ម និងវិនិយោគពីក្រៅប្រទេសមកកម្ពុជាកាន់តែច្រើនបន្ថែមទៀត»។
ជាមួយគ្នានេះសម្ដេចបានបញ្ជាក់អំពីការប្តេជ្ញាចិត្តរបស់រាជរដ្ឋាភិបាលក្នុងការ បន្តផ្តល់នូវមូលដ្ឋានគ្រឹះដ៏សំខាន់សម្រាប់ការធ្វើធុរកិច្ច និង វិនិយោគនៅកម្ពុជា គឺការរក្សាសុខសន្តិភាព ស្ថិរភាពសង្គម សេដ្ឋកិច្ច និង នយោបាយ ព្រមទាំងការបន្តខិតខំប្រឹងប្រែងកែលម្អ បរិយាកាសធុរកិច្ច និង វិនិយោគ តាមរយៈ ការដាក់ចេញនូវវិធានការគន្លឹះ លើគ្រប់វិស័យ ដើម្បី ធានាថា វិនិយោគិនអាចមកបណ្តាក់ទុន ប្រកបដោយភាពជឿជាក់ ភាពអាចប៉ាន់ស្មានបាន និង ជោគជ័យខ្ពស់៕
